.
من القصائد القديمه للشاعر الكبير مطلق بن شنار المديبغ
حازت على جائزة الشيخ أحمد صباح السالم الصباح في وصف وشرح فوائد الأبل 1988 .
سلام لكويت المعزه وهلها تحيةٍ قبل المثل نبتديبه
لقطابها والشعب والي نزلها اقولها بخلاص ماهي غصيبه
وسلامنا كل العروبة شملها صديقنا والا العدو ما دريبه
هذا وعنوان القصيدة مثلها بشرح عن البل كلمتينٍ مصيبه
سفينة الصحراء رسنها دقلها البل لراعيها معزة وهيبه
إجلودها نروي بها وتحملها والماء تجيبه لو بعيد قليبه
ولامن تعاطف خلفها ثم بهلها يكفيك عن كل المواكل حليبه
ولحومها يشهد لها من اكلها يقوله الي هي سبب كثر شيبه
وأبوالها تشفي العلل وتغسلها قاله رسولٍ كلنا نقتديبه
ونزيل حسك اوبارها ونغزلها ومنها نكون عقلها والجنيبه
وان صار جارك علةٍ من عللها تبعدك عن داره إلا بان عيبه
ونسنا عليها لا وردنا عقلها فوق المحاله من طويل الجذيبه
لا قيل ياراعي الجمل سق نتلها وغنت محالتها لحون عجيبه
ولا قل زاد البيت قرب جملها وقرب معه خطوى البكار الصعيبه
حيلٍ خطورتها على من عزلها تخلج الا عزلت وتزداد ريبه
ولا قفت تجوب أوعورها مع سهلها الزاد من كل الاماكن تجيبه
يازينها لامن ترزم فحلها في خايع عشبه يغطي شعيبه
وذلولها يازين شدت رحلها وقطع الفيافي فوق كور النجيبه
عملية رعى الوسامى عدلها تهذل هذيل الذيب وأيضا خبيبه
لامن رفعت الصوت زاد ابزملها منوت محب يبي ديرة حبيبه
تمت وبذكر الله نبي نكتملها وحرف بدينابه نبي ننتهيبه
مطلق بن شنار
التعليقات 2
2 pings
شاعر محايد
09/09/2015 في 8:28 م[3] رابط التعليق
لله درك من شاعر يعجز اللسان يابو راشد عن التعبير صح الله لسانك والشكر موصول لصحيفة الفرسان على نشر الابداعات
المتروكي
14/09/2015 في 9:44 ص[3] رابط التعليق
صح لساااانك وعسى عمرك طويل على طاعة رب العالمين شاعر زعب الأول بلاااا مناااازع