.
خرس العيون اللي هدبها مضاليل والخد براقن تكاشف شعاعه
لالاح من دهم السحاب المخاييل يجلي ظلام الليل لا البرق شاعه
عين المها كن خصرها ضمر الحيل عاشت نعيم وكنها في مجاعه
والردف ثقله رجح الوزن بالكيل سنام الردوم اللي رعت قفر قاعه
مبروم ساق وعنقها بارزن حيل من فوق كتفينه يبين ارتفاعه
وضفائره تلعب مع الريح وتميل حتى الهوى لوهب بشويش طاعه
يوصف على ذيل العبيه من الخيل ماطولت روس الشعر بالزراعه
وتفاحتين الصدر كبر الفناجيل مع لطف منطوقه شوية لكاعه
لو باصفه تاقف حروف التماثيل حاز الجمال اليوسفي واستطاعه
لا من طرالي قمت اجر المواويل واسهر طوال الليل ما نام ساعه
اثر السهر ياهل السهر يفتر الحيل وراعيه ياهل العرف ماله مناعه
ترى دروب الحب ماهي تساهيل تذهل عقول اهل الوفاء والقناعه
كم واحدن قبلي يعد التفاصيل اللي كسب واللي هوى القلب باعه
المشكله لا صرت تهواه بالحيل ومدار بين اثنين مثل الوداعه
صورة خياله سببت لي غرابيل متى متى بالله نطوي شراعه
ويرتاح فكري من جميع البهاذيل ثم ينشرح صدرن سريع اندفاعه
قبلي طحاطيح الرجال المشاكيل بنات حوى لوحن في ذراعه
ارماحهن قد قيل سم الرياجيل ولا ينكشف صوابهن بالاشاعه
لا عاده الله يوم جيت المداهيل الهاجس اللي داخل الجوف ذاعه
ياما اجتمعنا باخر الليل والليل في موقعن ما نسمع الا سباعه
همس الكلام العذب مع نافل الجيل تحت دماس الليل فوق الرفاعه
يمد لي من صافي البن والهيل ولا من هرج اقرب وحب استماعه
في خاطري يسوى جميع التعاليل لا صار قدم العين زايح قناعه
مبارك بن محمد الحذيان