.
تمر السنين وللنشاما طريق اوفاق تقديهم الطيبة معا صادق النيه
وراعي الحميه للجمايل ترى يشتاق ويفرح بفزعاته قريبه وعانيه
ومن لا احتزم باهل الصمايل وقع وانعاق تعثر على درب المعيشه خطاويه
ومنهو نصى خالد عليه السعد براق تصب المزون بصبح يومه وعصريه
نصيناك يارجل ٍ كريم وعظيم اخلاق وعلى عادتك ماغبت يالقرم موليه
لقيناك في وجه الشدايد شديد وثاق تركت الحجج للاش يالعنبو حيه
شذا ذكرك الطيب مع اهل الوفا ينساق وتعدى عن حدود الجبيل الصناعيه
تجملت في ربعك ولا احدٍ زهمك وضاق وعن حر شمسه صار في بارد الفيه
الا كم روت باسبابكم يابسات ارياق وبيوت ٍ نشاهدها على العز مبنيه
كفوف المصلي بالسحر تطلب الارزاق وتطلب ولي العرش جنه وحوريه
وانا باطلب اللي يرسل الشمس للاشراق يحرم على النيران جلد الوهيبيه
تربى ولدها للمواقف وطاب ولاق ابو بندر الشغموم زبن الجلاويه
عسى فالك التوفيق اقوله من الاعماق وتبطي بيوتي ماتجي فيك مرثيه
وصلوا عدد مايكفخ الطاير الخفاق على المصطفى واعداد من عيد ضحيه
ناصر بن متعب الحذيان