كل وادي سال له يوم يجف
لاتوالت فوقه ايام الجفاف
في حياتك لاتعيش بدون شف
واحذر تزيف على وجهك غلاف
والرجل لاصار يصدق مايهف
والحقيقة منجية لك لاتخاف
تدري ان الشر ذرعانه تظف
تدري ان سيد الادلة الاعتراف
وان بغا منك الرجال الكيل وف
وخل معك الزود لو طال المطاف
ومد كفك للكفو لامد كف
والردي خله وقاة للظلاف
كون واضح لاتدور ولاتلف
لكن احذر يطعنونك من خلاف
والطريق ان شفت فيه قف
اشرب الماء واترك السم الزعاف
والمصايب صايبه لو هي تدف
مالك الا ماكتب لك في الصحاف
ومن خطب في الغانمة جاته تزف
والثنا كلمة نعم يوم الزفاف
والظروف تحفنا بالوقت حف
والبنادم يحمد الله بالكفاف
واليدين اليا اعجزت لازم تكف
ومد رجلينك على قد اللحاف
والمصايب مختبر دنيا تلف
ولابه احمد سالم من الالتفاف
والثقال اليا تعقلنا اتخف
مثلما تثقل مع الجهل الخفاف
والقوي من الرجال اللي يعف
يترك الهزلة لرجل مايعاف
نختلف واحيان لاما نختلف
واختلاف الراي لايعني الخلاف
فيه واحد يصمد لعشرين صف
جعل يفدا قلبه قلوب الضعاف
والطمع فاقراب شق مايرف
يكشف اللي بالضماير مايشاف
ضعف نفس والشلي مايستخف
عزته ترفض لو سنينه عجاف
حمد بن نايف المدلاج