تصميم / ناصر الزعبي  

قصيدة الشاعر ناصر بن متعب الزعبي

مجاراة الشاعر حمد بن نايف الزعبي

هذي هي انقادت على مصر الزمول حاديهن السبع العجاف من السنين
جتها تبي تكتال وتزيد الحمول واذّن بها المذن تراكم سارقين
واللي يبي الآية مع أسباب النزول هذا هو صواع الملك فيها دفين
ولو كان بيبان القصور لها قفول ما كان من كنعان جوها راحلين
أمّا تركناها بلاش من الدخول ولّا دخلناها دخول الفاتحين
بعض الكلام يقال ماهوب امعقول وكلام ما ينقال لو انّه يقين
ماهو صحيح براحة اصحاب العقول ولا هو صحيح انه يبين الطيبين
تسجيل صوتي ما يملل بالملول كررت تشغيله قرابة ساعتين
العقل يسألني وأنا ما ألقا حلول لان الجواب يخالف العقل الرزين
والحرّ يلدغ من مجلجلة الذيول مرّة ولا يلدغ بجحرٍ مرّتين
واللي بسبق وله على اليمنى مثول فما له إلّا اسمه ولكنّه سجين
وكان الحظوظ تشابه قرون الوعول بتزين ولاّ ياعساها ماتزين
وشر العقوبة لا وقع فيه الشمول والخير لا والعاقبة للمتقين
مثلك تعلمت وعلمت انّي جهول الغطرسة شينة على المستضعفين
ضحية المتناقضة جلّ ونحول والعجبة ان اضدادها متناسقين
ثورة قلوب الناس من جفنٍ كسول وحنا نحايل قلبها اللي ما يلين
تزعل اذا دايم تراضيلك زعول او ما يبي يفهمك زين العابدين
ياساكب الدمع الحزين تقول لول حرام وصف اللول بالدمع الحزين
صحيح وجهات النظر عذر الميول لكن ترا يسار المقابل لك يمين
لذلك امش ولا عليك من العذول فانا كفرت بما آمن به الكافرين
وكان الهوا مشروط بايجاب وقبول شارين رغبتهم بديهي رابحين
ولو كان بحث المعرفة يعني فضول قلنا سلاما وانت سيد العارفين

حمد بن نايف المدلاج الزعبي