هاض هاجوسي وبالقاف أبتدينا الله أكبر والله أكبر والله أكبر
بـإسـم خالقنا تـعـالى نستعينا نبتدي بإسمه وله بالصوت نجهر
بإسم زعبُ وفالمواقيف أحتمينا الـرجال اللي لهم تـاريخ يذكـر
أتقدم بإسمهم فـي كـل حـيـنا إسمهم شامخ وأنا من حقي أفخر
كاسبين الطيب من ماض السنينا عـزوة التاريخ والمجد المسطر
الفعول الوافيه دايم تبِيّينا والنعم تنقالنا في كل منبر
المواقف كايده لكن علينا كل كايد لا قدمنا فيه يصغر
الأوائل كلها منا وفينا في المواقيف الصعيبه مانقصر
ضيفنا يقلط على سمن وسمينا حاضر الأيام ولا الوقت الأقشر
ماتزعزعنا الظروف ومخلصينا كل رجلٍ بيننا رجلٍ مقدر
كل طَيّب دوم مرفوع الجبِينا دون وقفاته تقدم ماتعذر
إيه حنا طول ماحنا حيينا نكسب الناموس للطالات نقدر
وإيه حنا والقبايل خابرينا للعدى ماعندنا إلا الموت الأحمر
ندحم الأخصام بالجنب المتينا خير لأهل الخير والدعوه تدَبر
للخوي عز وسند والمعتدينا مالهم من عندنا إلا السيف الأبتر
خالد محمد بن طامي الزعبي
التعليقات 1
1 ping
حمد العيا ابوياسر
11/07/2020 في 7:46 م[3] رابط التعليق
القصيده رائعه بيض الله وجهك يا خالد.. كل شعر مرجله وفخر .. صح لسانك