ضيقة ٍ تال العصر ماهي جديده كل غيبة شمس بيّن لي زعلها
ليت جيّتها عواقبها حميده مير اكافحها مكافح واحتملها
واتسلا من قصيده في قصيده كود نفسي ماتبين لي خللها
ولا يوسع خاطري ويفك قيده غير مسراح ٍ وعاد النفس ولها
واستوى الخط العمومي بس سيده فاهق الديره وتاركها لأهلها
والله ان فرقا البلد فرصه سعيده تستريح النفس وتجدد أملها
صوب شقح ٍ تاخذ القلب ووريده مايعذربها يا كود اللي جهلها
في تغطرسها تبختار العنيده كنها تشرب من الغيم ونتلها
واهزعة عرقوبها ميزه فريده تحسبنها في سنده واهي بسهلها
ورقبتها من النخل تاخذ جريده مطرق ٍ تقدر تعدد في فصلها
ولا لقاها راعي الاريا السديده يضرب الطبلون والسومه دبلها
هي غناة الرجل من قبل ورصيده مستحيل يزل ويدور بدلها
والرجل لاشاف ذوده يوم عيده كن همه غترة ٍ قام ونطلها
ولا أرخصوها اللي بداوتهم جديده والله أنها غاليه بعيون أهلها
مبارك بن فالح الوشمي