سبحان من بأسمه نسبح وسبحان الواحد اللي له حنت كل هامه
يامبدّلٍ خوف المسلمين بآمان ندعي ونرجي المغفره والسلامه
الحجر يعطينا دروسٍ بـ مجان ماجابها ساعي بريد وحمامه
منها عرفنا شي واضح بالأعيان نميّزه ونحط عنده علامه
وش قيمة اللي مايعوّض بالأثمان أولهم المسجد وأهلْه وإمامه
كنّا فقدنا داخل الروح الإنسان الله يعجل بالفرج والغمامه
والوصل بأرحام وبني عمّ وأخوان وجمعا الصديق اللي عزيزٍ مقامه
الحمد لله لو نفكّر بالأذهان بأنعام ربي محدْ خلّص كلامه
للمسلم الأسلام هو ساس الأديان نعمه عساها نعمةٍ مستدامه
المسلم الخيّر بيسعى للإحسان ويحسن لخلق الله ولو في سلامه
مافيه مثل الذكر يرجح بميزان ويزيد بالحسنه ويمحي آثامه
أغلى وأجمل شي في كل الأحيان الدعوه اللي بين آذان وأقامه
تروي ضما الضامي وتسقيه هتّان ويبل صدره من هو الحزن ضامه
هذي نصيحه والنصيحه لها شان للغافل اللي بين ذنب وملامه
صلاتك وتلقى حياتك بها كان حفظتها حفظ الرجل لكرامه
ورتّل من المصحف ترا النور قرآن لا أشتد ظرف ووقتك أظلم ظلامه
يرفع مقام ويطرد هموم وأحزان اللي قراه يزين بالخير عامه
ومن صد عنّه عاش بالعمر خسران مافي حياته غير همّ وندامه
الرابح اللي رتلّه قدر الإمكان لأنّه بيشفع له بيوم القيامه
محمد بن عبدالله ال هميّم