حيام ياحروفي بعد صبراً جميل المدح توه شدني له منبره
والهاجس النيّاف في يوم الحصيل كل الجزايل لا بغى ماتعسره
وجّه يا هاجوسي على زبن الدخيل أنصى سليل المجد فراج أشكره
على فعوله كل صبح وكل ليل وعلى سكوته في زمان الثرثره
جيته وانا ضامي وساق السلسبيل عزالله ان المجد كله سطره
طاحو علي القوم ولا جاهي بخيل وحشّمت جاهي والدروب ميسره
ولاقلت سويت وعطيت أبن السبيل مع أنك اعطيت الكثير من أكثره
ياجعل يفداه الردي وأبن البخيل اللي لامنْه اعطى كتب في دفتره
ولا بن مديبغ جعل عمره طويل مافيه خاطر منكسر مايجبره
ضاري على الوقفات لا هاب الذليل مايمر ليلٍ حالك الا يسهره
حامي حما داره ليا شب الفتيل وقف وحط الشعب كله بظهره
وقال أزهلوها وأنتصر وأكبر دليل بعثر هل الارهاب سيفه بعثره
النادر المقدام شيال الثقيل الصعب لا حطه براسه يقدره
مايعترف في قول ما يخدم بخيل عطاه لله ما يدور لـ خبره
سوى الجميل ولا يبي رد الجميل كنه سحابٍ جمع الما وأنثره
الطاهر السمح النبيل أبن النبيل جميع قرمٍ يعرفه ما يهجره
خذا مْن ابوه العلم والصيت المهيل ودون الضيوف المال مايوم ذخره
وخذا مْن أبوه الفعل والمد الجزيل كم عسر بعد الله فعله يسره
عزالله انه مرويٍ حد الصقيل ماحركو من راسه أعداه شعره
ووالله يافخر القبيله مستحيل يمر فعل الطيّب وما نذكره
عبدالله بن شنار