سبحان من ساقه بلا دين وجهود ما كنه الا دعوتن مستجـابه
الاوضح اللي تطرق سباله النود يلطم بعرنونه قنوف السحابه
ابوه ما عرضن بناته بـ مردود صدرن لهن يوم المـزاين مهـابه
وامه بمشراها لها البنك مضهود تعمـد مع المصلاح ماهي جلابه
زينه مهو يلزم على ساسه شهود اضحك من العذروب ما رد جابه
عز الله ان اللي زهد فيه مقرود وياطيب راس اللي تعزوا وجابه
هاب الذليل وساقها كاسب الفود عوايد اللي شوف عينه نصابه
من قاطعين الراي لا عودن سود ذيبن يهابون الرياجيل نابـه
وساقه براس المال ما غره الزود وعزز شريكه يوم للعود جـابه
من لا ذخر فالوقت له خوة فهـود من خوة الزعـبي وخوة عتـابه
متواضعين ان صارت سهود ومهود والصاملين ان عودت لك نشابه
عز الله ان اللي بما احتاجه يجود هو والله اللي فالكرم ينـحكابه
وعز الله اللي ما مشى في هوى العود يـرجى من الميّت ولا ينـرجابه
الشاعر/ يوسف الحسيني