هذه القصيدة قيلت في رثاء شرعان بن رجاء ابن شرعان رحمه الله
الذي وافاه الأجل المحتوم بتاريخ 8 نوفمبر 2019
يا الله يا منــزل تبــارك والإنســان والنــور والتكـوير والطــور والتيـن
يا موجد الحكمة على لسان لقمان يـا مبـدع ٍ تكويــن آدم من الطيــن
يــا مسيّر الــدنيــا بتـدبير واتقــان وآجالنـا وأرزاقنـا بيـــن قـــوسيــن
بأسمــاك ندعو يا رحيم ٍ ورحمـان ولك نلتجي بالليــل يا فـات ثلثين
يا ربّ نرجي غيـث جودك وغفران عفوك ولطفك في حفيد العزيزين
يا الله تعمّ بفيض الإحسان شرعان ابو رجا اللي يرجحــن له موازين
سمح النبا تاج الوفا ذرب الأيمان أبو رجاء شرعان طلق الحجاجين
للطيــب رمــز وللمواجيب عنوان ومنصى البعيد ومدهل ٍ للقريبين
على المراجل والفخر شاد ديوان صرح ٍ ومدهل للرجال الشريفين
في مجلسه صفوة شيوخ ٍ وشيبان وطلّاب جاهـه والشفاعــة كثيرين
مرحوم يا رمز التواضع والإيمــان يـا من شهـد له بالمواقف براهين
على رحيـلـه خيّمت ديم الأحزان وأضحت محاسن قبلة ٍ للمعزين
الله يبيــح الليّ فقدنـاه وكـــدان وعسى مقـــره في نعيم التقيين
عسى الولي يجزاه روح ٍ وريحان والحمد للمعبود بالعسر واللين
لنا العزاء بغياب شرعان الإحسان بعيــاله الليّ بالمواجيـــب وافيـن
عبدالعزيز سليمان الفدغوش
مرثية غازي بن مناور العتيبي في وفاة
شرعان بن رجاء ابن شرعان رحمه الله
في الجمعه الي فات جاني خبر شين بعد صلاة العصر نكد عليه
وفات رجالٍ من الناس الاقصين وعندي من اغلا الناس وادنا الدنيه
ابو رجا شرعان والله ونعمين راع الوفا والجود مافيه زيه
بابه مشرع للرجال الحشيمين الضيف والجيران صبح وعشيه
تلقا الدلال الصفر وعيال صاحين والعود الازرق والعلوم الطريه
ومن بعدها تلقا عيال البعارين مبركات في الصحون المليه
مرحوم ياشيخاً توفى على الزين الله يكتب له شفاعة نبيه
ويحط في قبره زهور وبساتين ربي جليل الملك جزل العطيه
وبعد رحل عقب عيالً عزيزين نعم العيال ونعم كل الدنيه
محمد الوافي طليق الحجاجين عز الرفيق وعز منهو خويه
وغيره سعد وسعود والله وافيين الكل منهم مايبيله وصيه
ورجا عسى الله ينظره زين بالعين ويجبر عزاه براعي الاوليه
ويصلح لهم شرعان ويحفظه اسنين ويطلع مثل شرعان جده حليه