إقرأ رسايل واحدٍ يسهر الليل عل وعسا تسهر مثل ما سهر هوّ
يا سارق الراحة ومهدي البهاذيل ياللي أشوفك ثلج ما تشوفني ضوّ
تدري وش يزعّلني بجد ّ يا ابخيل لا قلت ابيك اتجيني وقلت لي توّ
على ايش توّ وطافحٍ عندي الكيل عطني مثل ما اعطيك ومن الجفا شوّ
وياليتني ماجيت ذيك المداهيل يا شينها واهل المداهيل ما جوّ
ما باقيٍ لي غير طيف وتماثيل وحالي بدون طيوفك اسوأ من السوّ
وياليتني ما شفت ذيك المكاحيل اللي تعيّشني اذا شفتها جوّ
لكن تروغ من النظر كنّها خيل فرسانها ما يركدون ان تعزووّ
وتراك عندي روح الآمال والسيل يحيي جفافي بس ما في السما نوّ
ولا دمرني غير كذب التعاليل زودٍ على الواشين بي ويش سوّوّ
هذي هي اوضاعي بكل التفاصيل أتشاءم بياليت وأتفاءل بلوّ
والكي آخر طب قلبٍ امعيليل وبكيفك وتستاهله كوّ ثم كوّ
حمد بن نايف المدلاج