يا زماني وش حرق من صافي الأيام دمّك ليه تقسى والقسى ماهو على مثلي مولّا
كل ماتقبل بشدّاتك علينا ما نذمّك ألتفت وتشوف فينا بـ القسى سيفٍ يسلّا
الشجر في برّك وترسي السفن بأطراف يمّك من هنا مينا محيط ومن هنا غصنٍ تدلّى
عدّ يا مزن ٍ عليك القلب لاعديت يمّك أروّ قلبٍ ودّه بروضٍ عليه الحلم فلّا
وأنت ياللي دمعتك شرهاتها بأطراف كمّك مايضيق اللي توضا وأقبل لربه وصلّا
صاحبي والوقت لاأشتدت ظروفه لا يهمّك أنت حر وكل ماصكّت على مثلك تعلّى
كان عندك هم لاتشكي على ذا الناس همّك أعتنز بالله وحاول كل ماضاقت تسلّا
جلسةٍ ما بين شيبانك وبين عيال عمّك راس مال وفرحةٍ تسوى ووقتٍ مايخلَّا
محمد بن عبدالله الهميم