في ليلة من ليالي الفرح أحتفل فراج بن معيان ال شرفان بزواج نجله « محمد »
وذلك يوم الجمعة 1440/4/21 الموافق 2018/12/28 في قاعة الخفجي للاحتفالات بحضور جمع من الأهل والأصدقاء المحبين والمهنئين غمرهم الفرح والسرور
صحيفة الفرسان تبارك له وتتمنى له حياة سعيدة وأن يرزقه الله الذرية الصالحة .
صور من سناب الصحيفة
ياوجه واجه وانتحي يامعاذير لا يفرحون متبعين الوشايه
الجيب والم لو تطول المشاوير وشعري يفيض ويمتلي في حشايه
فرايد الافكار وردٍ مصادير واللي تشوفونه مغير البدايه
حنا ولو تكثر علينا الشواعير اطيبهم اللي نلمحه فـ المرايه
وان قدمتني لابتي للجماهير مانيب شاعر مايقديه رايه
اجيب قافٍ غير معنى وتعبير وادرى عليه امن النقايد درايه
انا مادور من ورا هاجسي غير نوماس ربعٍ ينحكابه حكايه
في شف زعب اصخر القاف تصخير واحمى مواقيف القبيلة حمايه
قبيلةٍ ما ضيعوها الدواوير يامن بهم خايف ويندل تايه
والعايل اليا طاع فيهم الاشاوير ان ما هداه الله ماله هدايه
ماله هداية كود حدبٍ بواتير في حدها ينشاف خط النهايه
ربعي دهاة الحرب لا دبّر الخير ثم ارتكز للحرب عطفة ورايه
روس العدا عقب المكاون بعاثير شلايخ اطباقٍ بنادي الرمايه
غايتهم السلامه من اي تقصير وسلامة الارواح ماهيب غايه
وان قيل عدد روس زعب المناعير اقول في فراج تلقى الكفايه
فراج ابن شرفان شوق الغنادير مراجله ما يدعيها دعايه
ما يذخر الفزعات كن المعاسير لهم على فراج حق الوصايه
يا قلهم قلاه فالوقت الاخير من يهتوي كسب الجمايل هوايه
واللي مثل فراج منطق وتدبير يجباله النعم المسمى جبايه
من يصفط لـ غيرة عناية وتيسير يسر له الله واعتنابه عنايه
علي بن محمد البراطمي
في محفلً ينطحكْ بنّه وطيبه محفل هل الطالات والطيب والجود
سلام للي يحتمون الصعيبه ساس الوفااء والطيب حمّايه الذود
في حفل ابو فراج منصا صحيبه يامرحبا واعداد ماذعذع النود
ابوك يامحمد يشرّف قريبه من ضامته دنياه عنّز على العود
جميع ربعه فـ القشر تعتزي به تعرف مواقيفه ولا عنه منشود
من لاذ به هانت عليه المصيبه والمعضله في دربه سهود ومهود
يمناه سيلً منتحي من شعيبه يعطي ولا يبغي من الناس مردود
جميع ما حاشت يديه يغدي به كرامته للضيف حقٍ ومفرود
كل المدايح والثنا من نصيبه يستاهله فراج والعالم اشهود
واعياله اللي ذكرهم لو نجيبه كل ابلجً ذكره مع الناس معدود
صبيّهم ينطح جموع الكتيبه خياّلة الشرفا ذرا كل مضهود
وإن طبت يامحمد فلا هي غريبه خوالك اللي ف المراجل لهم زود
من لابتن وقت السيوف العطيبه ربعً تغيض اكبود وتفرّح كبود
قبيلةً ساس الفخر تعتلي به لا ثوّر البارود ياتونك احشود
زبينهم خابت مساعي طليبه احمايته في ظلهم مالها حدود
عدّوهم ذاق الغبن والغليبه ورفيقهم يرقى على الشامخ الطود
وأختامها واعداد ما انشى سكيبه يامرحبا على الشحم وازرق العود
راشد محمد الحذلم المري
الشاعر اللي ما شعب بالقاف نار محدٍ دري في النار لوهي موقده
وعلى سمان القاف لا انزاح الستار في قمة طويق يتراكا بوحده
شاعر يروم المجد ويجول الديار ويبرق مع البارق ويرعد برعده
والى مدح يمدح رياجيلٍ خيار يعدهم فالليل الأسود مسنده
أسم آل شرفان انوضع بين الكبار سلالةٍ بين الزحول مردده
وفي حفلهم ننطق بها عز وجهار الله يحييكم على عرس ولده
عند الكريم اللي لامن الوقت جار يندى بفعله مثل ما تندى يده
فراج ابن شرفان في كل الديار اسمٍ نماري به ونفخر فسدده
ابو معيان انخلق عون وعمار وهبه من الله حطها من مولده
فراج للمعسر لا ضاقن الحرار والضايق اليا جاه يبشر بسعده
دون القبيلة متخذ نفس المسار ماهو يحابي شخص وآخر يبعده
كن المدايح ما تبي غيره مسار المحزم اللي ثر ماله وجهده
خيرة بني عمي طويلين العمار مبعد الهقوه بكل الأصعده
عبدالله بن شنار
يالله بندرٍ مالقوه القواصيد شرايدٍ راع الفكر ما طرحا
تصعب على اللي ينقلون البواريد الا الفطين اللي خياله لمحا
منقيتن تارد عذى المواريد ما شح مالكها على ممتنحا
اسوقها للي عساء يومه بعيد شيال حمل قريبين المضحا
فالحفله اللي كنها ليلة العيد يالله بتوفيقك يتمم فرحا
في حفل ابن شرفان قرم الاواليد اللي ليا كبرت علينا نطحا
يرخيلها متنن يضد الاضاديد وان كبرت هموم الرفيق اكتسحا
يزمي على العليا مثل زامي الحيل وان هبته صلف الهبايب صفحا
في واجبه ماهو براعي تصاديد لا خسرو ضعاف الروابع ربحا
ديوان بيته مدهلن للاجاويد قريب ولا من بعيد المنحا
على الشحم ومبهارات البغاديد وسوالفن تطرب لها لا شرحا
طبعن لبو معيان من عاده وغيد تصعب طموحاته على من طمحا
صنديد ومعنز على كل صنديد قومن شغاميم العدا تمتدحا
ما قلتها والله مدور مقاصيد بس الصحيح من العقول يتصحا
وان جيت امجد طيب الراس تمجيد اعد ما شفته ما اني بتوحا
تمت يافراج وفدتك المقاريد اللي عن دروب المراجل تنحا
اطيبهم اللي ما يهاب المناقيد واعراض خلق الله لا غابت جرحا
يعد روحه مثل عنتر وابو زيد وهو يخاشر حرمته في قدحا
اللي يحسب المرجلة خدمة الغيد خله يولي لعنبو ذا الملحا
وان قمت اردد مدح فراج ترديد يمناه شمطان اللحا تمتدحا
سعود بن مدلاج