تصميم / ناصر الزعبي
الليل راح اكثره والباقي شويه
والنوم عيا على عيوني ولا جاها
ماغير انا والقصيده روحه وجيه
اتعب عليها من اولها ليا اتلاها
وارتب ابياتها ترتيب فرديه
عند بدوي ٍ مسنعها ويدراها
ماطبت السوق وشبوك الشريطيه
ولا كل منهو تمناها بيقواها
تحتاج قلب ٍ قوي مع قو ماليه
ماهوب لاشاف له بكره تغالاها
تداولوا ذكرها والنيه النيه
رحت انشد الناس عنها واتقصاها
قالوا لي اقفى بها اللي حي طاريه
كب الدراهم لراعيها وتقفاها
مايلتفت للظروف الاقتصاديه
يدور النادره ويزيد مشراها
على التحدي يبين لك تحديه
وان قلطو له من الدله تقهواها
فرحان لا عدو الاسما الكباريه
مع اول أسما الكبار ان عدو اسماها
ماعند خيالة الحيزا محنيه
خذنا الاوايل عليهم واحتكرناها
امزاين ٍ فالكويت وفالسعوديه
بأسبوع جينا جوايزها واخذناها
هذي بنات الفحل من نخبة الميه
وهذي بصفق الملايين اشتريناها
نوادر ابل العرب ماهيب عاديه
سبحانه اللي عطاها الزين واطغاها
يالين صارت مع اهل الزين ماريه
سوالف اهل المزاين عن مزاياها
كن تحت ماطا قدمها جمرةٍ حيه
تشوش لا سمعت الوبال يشعاها
تقبل ودايم على الاول رهاويه
وتقفي وناموس اهلها ما تعداها
يبرا لها زعب والوقفه حماسيه
روس الرياجيل ماتبرد حماياها
مبارك بن فالح الوشمي