برقن ينوض ونوض برقه تعاجيب يلوح وسط المزنه المدلهمه
لا لاح ذهني يصحي شوي ويغيب وراع الولع لا ناظره زاح همه
ياذيب انا طالبك لاتهيض الذيب ترى جروحه بالحشا مستلمه
يابنت انا لوح على دقني الشيب ولا عادلي يم الرعابيب يمه
ياما رقينا فوق روس المراقيب نشرب على شان الهوى كل جمه
نارد على جاله زلال المشاريب ونهوم فيه ونعتلي كل قمه
واليوم من دونه تحول العواقيب نخشى عواقيب الامور المطمه
في روضة المسجد عن الفرض ماغيب ولو نسمع اللي ذمنا مانذمه
لكن بجنب سكت الغي تجنيب وبأمر الولي اوضاعنا مستتمه
روحي مراويح القطا باللواهيب باعلى الفضا يسكب جناحه ولمه
يتلاه عج وصلف حامي الدواليب متنحرن وبل الثرى يوم شمه
يابنت خطلان اليدين الاشانيب انا اطلب الله تالي العمر اتمه
سعد بن تركي السحوب