تفيض المدامع كل مامرني طرياه ولا لي جدا ياكون دمعه وتنهيته
اصبّر خفوقي واحمد الله على ماجاه لعله يحقق لي مرامِِ تمنيته
سبايب وليفِِ لي كتب ربي بفرقاه الاقدار قفّت به والاحزان قافيته
لو انه على كيفه يداريني مداراه لكن ماحداه الا قرارات اهل بيته
غدى القلب من فقده سجين الحزن والاه يكابد معاناته والاوهام مشقيته
سقا الله زمانِِ قد مضى كنت انا وياه ليا من تباطاني على الدرب لاقيته
ابيع العرب لجله وازعل عرب لرضاه حبيبِِ على الخلان والخلق بدّيته
اسوق القدم صوبه شفوقِِ على لاماه جنوبِِ من الديره ليالِِ تحريته
ولا جابته صدفه الا وينها دنياه قطعت الرجاوي وازرق الدمع هليته
هذا والله الي لو يطول الدهر م انساه يالولا الحظوظ السود ماكان خليته
وذا الحين انا ماغير عايش على ذكراه وكل السبايب من قرارات اهل بيته
عبدالله بن ناصر الجهام