.
خطوط جوالي كما خطوط الحياة شيٍ يشتت هقوة العقل اللبيب
وجه الفقر ما يقنعه وجه الغناة ليه اغترب وان جيت ليه ارجع غريب
طموحي الطماع مايروي ضماه لا المنّ والسلوى ولا ماي القليب
و لجل الطموح اقف مواقيب الدهاه اللي لا شافوها العرب قالوا يهيب
وانا يا لولا الله وتأثير الصلاة ماكان عندي عزم حرّ وقلب ذيب
اكابد الدنيا ومن فضل الإله قلبي رحيب ياسع الكون الرحيب
خذ لك ولد لا طاح ماسمّعْك آه لا يفرح الشامت ولا يزعل صحيب
والطيحة اللي ما تسبب له وفاة منها يقوم اقوى ومحتاط ونجيب
اسوق رجليني مع كل اتجاه شبحي سما واللي يجيب الله يجيب
و المشكلة ماهي مع الشبح وسماه المشكلة مالي مع الطيّب نصيب
لكن انا راضي بما ربي قضاه الخير فيما اختاره العدل الحسيب
خساير المسلم بما تكسب يداه وغنايم المسلم من الحيّ الرقيب
فـ يَ الله لا تكتب عليّ دأب العصاة وارزقني التوفيق والقلب المنيب
علي بن محمد البراطمي