.
جنسيّة العشق ما تعرف ولا دوله عنوانها الوصل والرحمه دوافعها
لو انّها تشمل العالم على طوله ما أظنّها تشمل اللي غايتي معها
آخذ بها مع مسافات الوله جوله حتى مع النوم اصافحها واوادعها
من جرّب العشق عاش الهم وفصوله لا قام ليل السهر للعين يدفعها
ولا اقفى ربيع الوصال وجفّت سيوله وش تعني الدار لا شحّت مرابعها
يا غايبٍ تاقف الشرهه على زوله حناجر الشوق ليتك بس تسمعها
والموعد اللي رسمته وانفجر هوله ما كنّه الا الكوارث في مطالعها
لو تفهم العشق ورموزه ومدلوله ما شفت عيني شكت لك من مدامعها
حريّة العشق كلٍ يدلي بقوله ولا فيه حاجه عن الثاني بيمنعها
الصمت حوله يحول وكلّنا حوله ونار الكلام الحقيقي من يولّعها
اطلق كلام الغلا واسرج لي خيوله والنصر موعد وصاله في مطالعها
عبدالله بن شنار