.
يسري بفكري هاجسي وأتغناه واسج واخذ معه صوله وجوله
لو كان لي عامين مانيب وياه بس العلاقه من سنين الطفوله
أترجم شعور الفرح والمعاناه عبر البيوت النادرات بسهوله
مالـ الشعر قيمه إلى غاب معناه وإن جا بصدق احساس يلقى قبوله
يلامس اللي يستمع له ويقراه يستسهله لكن مايقدر يقوله
مانقص بهذا ولا زاد هذاه وما هوب معيار يقيس الرجوله
كم غنته عذرا وكم رجل غناه وطالت لها بيت عجز لا يطوله
الرجل يكسب طيبه بفعل يمناه ياقف كلامه وتتكلم فعوله
وقصيد هراج السعه والمباباه بيعة حكي ياخذ عليها عموله
هذار واليا وجّبت تسمع رغاه ولا أوحيت صوته نوب ماشفت زوله
لو يكثرنّ ألقابه وتكثر أسماه واهل العقول الفارغة صفقوا له
لا خير في شعره ولا خير بحكاه اللي مثل هذا يغير ميوله
فهد ال منيف