.
ياسعود انا شرفت روس الشواهيق
وعديت بالفكسار ضلعان وفجاج
الي على المطلاع مثل الاباريق
مالي ومال السالميه والابراج
وغنيت من راسي جداد الطواريق
والي مهيضني على اللعب فراج
انا اشهدن الطيب وهبه وتوفيق
وانا اشهدنه طيبً يا ابن مدلاج
الناس مثل مقفلات الصناديق
ولو لا التجارب غشنا كل هراج
كم واحدن نحسبه ابانات وطويق
وروّح كما الزبده على صالي الصاج
ولّا ترا فراج باليسر والضيق
مدباج بالهيه وللضيف هداج
ومن دون قاصر بالرجال المطاليق
ماكل من سموه فراج فراج
اقولها واوثق العلم توثيق
لانيب انا قاصر ولانيب محتاج
جدي تنصته الركاب المشافيق
وخالي مغازيه ورا ساحل العاج
محمد بن مبارك الوافي
وهذي مجاراة القصيده للشاعر سعود ابن مدلاج
تفتحت بيبان قلبن مغاليق
وتباشرت مابين مسرا ومعراج
هيضني محمد بجزل المساويق
قافن له ارقاب العواريف تنعاج
نوادرن ماجمعوها المطافيق
الي يحشون السوالف بكرباج
مدح النشاما للنشاما مواثيق
وهرج الحقيقه كنه النور لنباج
فراج اخذله في سما المجد تحليق
مواقفن تصعب ع كل هلباج
كم جاه يشكي ضيقته يابس الريق
كنه سجينن ينتضر يوم الافراج
عود وهو فالح ومرتاح ومفيق
متهني بحلو الكرى وسط ديباج
يفداه من يبكي ع القرش لا سيق
مراجله صر الدراهم بالادراج
بين الجماعه محرين بالتفاريق
والعز والجمعه تسبب له ازعاج
كبه وجازه يامحمد بتفهيق
جرح الخفا يبقى خفا ماله علاج
وامدح مثل فراج شوق الغرانيق
جزل الشعر بهل الوفا فلة حجاج
وافي يا ابن وافي وشاعر وذويق
يشهد علي الي له الخلق حجاج
سعود ابن مدلاج
التعليقات 1
1 pings
فيصل الشرافي
07/06/2016 في 5:48 ص[3] رابط التعليق
صح لسان الوافي وبن مدلاج ويستاهل ابو معيان.