.
ليس صحيحاً أن المواقف هي التي تصنع الرجال وإنما الصحيح هو أن المواقف تولد في ظل الأقوياء من الرجال
موقف قل من يفعله في زمننا هذا موقف لاينسى حصل مع حمد بن نايف المدلاج
علمنا بهذا الموقف الجميل والمشرف وقمنا بالاتصال به وروى لنا هذا الحدث مع القصيدة :
قام حمد بن نايف المدلاج بشراء بكرة حوارة (فردية قوية) عمرها 3 أشهر من راجح بن راجح المري بمبلغ 750.000 ريال .
وكان يريد تجهيزها لمزاين الظفرة والاستمرار في المشاركات لكن كثروا الزبائن اللي يسومون البكره وأعطوه مكاسب طيبة حتى جاء ( عليوي بن مانع العرجاني) ووصل سومها الى 2.700.000 ريال واراد الله ان يبيع ابو نايف لان فيها مكسب كبير والرجل يريد أن يشارك هو بأسمه واسم قبيلته ويطمح للفوز وكانت البكرة مواصفاتها قوية ومرشحة للفوز.
وباقي مبلغ 2.000.000 ريال في شيك .
ويتابع ابو نايف : جهزناها للمشاركة له وأصبحت البكرة على افضل حال وجاهزية لكن امر الله فوق كل شي ، ماتت البكرة قبل إقامة مزاين الظفرة بقليل ووقف نصيبه منها .
طبعا هو راضي بما كتب الله
قمت انا وحلفت عليه من الشيك بمليونين ريال
اسأل الله ان يجعلها خال لوجهه الكريم
(ومن ترك شي لله عاضه الله بخير ) .
وبهذه المناسبة قام الشاعر محمد بن راشد العرجاني بكتابة هذه القصيدة
القصيدة بصوت الشاعر محمد بن راشد العرجاني
توكلت باللي يعلم الغيب والنيات ودقيت سلف اللي بعيدٍ مشاويره
هواجيس شعري تلتهب وابرك الساعات وذبيت رجمٍ يكشف الجو والديرة
رقيته ابي بدع المثايل على العادات وجريت صوتي عقب ما زان تعبيرة
ومن بد كل الناس تنصا حمد بالذات ومن دون ابن مدلاج مافيه تصفيرة
سلامي على اللي بالمواقيف له وقفات ابو نايف اللي ما يحسب مخاسيرة
صميدع وطيب راس ويبين بالشدات وإلا ثقلت الحملة لها نوخ بعيرة
يحوش المراجل والنوادر من الطرعات بيمناه وبسوقه لها من دنانيرة
على المركز الاول يكم حقق انجازات لامن شاشت الذاير يشوش وجماهيرة
حمر عين وسنافي وله صوله وجولات والأقصين والادنين قد عمهم خيرة
ومطنوخ طبعه هاك ماهو يعرف الهات على المرجله والطيب متواصلٍ سيرة
شرا منه بن عليويٍ حاشيٍ ثم مات وتعزوى بزعب وقال يبشر له بغيرة
مليونين طلق منها صادق الفزعات وهو شيكها بمخباه ماهوب في حيرة
انا شاش راسي من فعل كاسب الطالات معا ابن عليوي طيب الراس والجيرة
علي الحرام انه كفو صامل الهدات وميقافه بذا الوقت يا صعب تكريرة
وانا شاعرٍ انحت صخر واسبح الغبات وذا الموقف اللي يطلق الوجه تصويرة
ونيابه عن ابن عمي ابهدي الابيات لبو نايف اللي يلزم الكل تقديرة
هذا زعبيٍ من دون كسب العلا ما بات وذا عرجانيٍ بالطيب تقدح صعاطيرة
محمد بن راشد العرجاني